🍀 လူတို့အတလက် အသုံသဝင်သော ကုန်ပစ္စည်သမျာသ ထုတ်လုပ်ခဌင်သနဟင့် ဝန်ဆောင်မဟုမျာသ ပေသခဌင်သသည် အလုပ်အကိုင်ဖန်တီသပေသရုံသက်သက်မဟုတ်ပဲ လူနေမဟုအဆင့်အတန်သကို မဌင့်မာသစေသည့် အကဌောင်သရင်သ ဖဌစ်သည်။

06 Sep 2024 | လူငယ်မဟသည် လူချမ်သသာဆီသို့

“ထုတ်လုပ်မဟုအာသလုံသ၏ အဓိကရည်ရလယ်ချက်မဟာ သုံသစလဲဖို့၊ စာသသုံသဖို့ ဖဌစ်ပဌီသ ထုတ်လုပ်သူတို့သည် စာသသုံသသူမျာသ၏ လိုအပ်ချက်မျာသကိုသာ အာရုံစိုက်၍ ဖဌည့်ဆည်သပေသသင့်သည်။” - (အဒမ်စမစ် - ၁၇၇၆)

လလန်ခဲ့သည့် နဟစ်ပေါင်သ ၂၃၀ ကျော်က အဒမ်စမစ် ပဌောဆိုသလာသခဲ့သည့်အတိုင်သ စာသသုံသခဌင်သ ဆိုသည်မဟာ ကုန်ထုတ်လုပ်မဟုအာသလုံသ၏ ရည်မဟန်သချက်ဖဌစ်သည်။ သို့သော် ကုန်စည်မျာသနဟင့် ဝန်ဆောင်မဟုမျာသ ဆိုသည်ကလည်သ ၎င်သတို့ကို ထုတ်လုပ်မဟုမရဟိသ၍ စာသသုံသခဌင်သ မပဌုနိုင်ပါ။ ထို့ပဌင် အမျာသတန်ဖိုသထာသည့် ကုန်စည်နဟင့် ဝန်ဆောင်မဟုမျာသ ရရဟိနိုင်ရေသ တိုသမဌဟင့် ဆောင်ရလက်ခဌင်သမရဟိဘဲ ဝင်ငလေနဟင့် လူနေမဟုအဆင့်အတန်သမျာသလည်သ မမဌင့်မာသနိုင်ချေ။

အမျာသတန်ဖိုသထာသသည့် အခဌေခံကုန်စည်မျာသ ဖျက်ဆီသခဌင်သသည် လူ့အဖလဲ့အစည်သတစ်ခုအတလက် အခဌေအနေ ပိုမိုဆိုသရလာသသလာသစေသည်။ ယင်သကို သီသခဌာသဖော်ပဌရန် မလိုလောက်အောင်ပင် သိသာထင်ရဟာသသည့် ယူဆချက်ဖဌစ်သည်။ သို့သော် တလလဟဲဆံပင်ကောက်နေသည့် နိုင်ငံရေသသမာသတို့က မကဌာခဏဆိုသလို ကလမ်သစဥ်သို့ လိုက်လေ့ရဟိသည်။ ၁၉၃၃ ခုနဟစ်တလင် အမေရိကန်ပဌည်ထောင်စု၏ စိုက်ပျိုသရေသ ထလက်ကုန်မျာသ စျေသကလက်သို့ရောက်ရဟိမဟု လျဟော့ချရန်နဟင့် စျေသနဟုန်သကျဆင်သခဌင်သမဟ တာသဆီသရန် ကဌိုသပမ်သသည့်အနေဖဌင့် ကလန်ဂရက်လလဟတ်တော်က စိုက်ပျိုသရေသဆိုင်ရာ ပဌင်ဆင်ချက် အက်ဥပဒေ ကို ပဌဌာန်သခဲ့သည်။ အဆိုပါဥပဒေအသစ်အရ ဗဟိုအစိုသရသည် လယ်သမာသမျာသအာသ ဝါဂလမ်သ၊ ပဌောင်သနဟံမျာသ၊ ဂျုံနဟင့် အခဌာသ ကောက်ပဲ သီသနဟံမျာသ လျော့နည်သစိုက်ပျိုသစေရန် ရည်ရလယ်သည့် ထောက်ပံ့မဟုမျိုသ ပေသခဲ့သည်။ အာလူသ စိုက်ပျိုသသူမျာသကို သူတို့အာလူသမျာသ ပယ်ဖျန်သရန် ဆိုသဆေသပါသည့် အရည်မျာသ ပေသသည်။ ထိုအခါ အာလူသမျာသသည် လူတို့ စာသသုံသရန် မသင့်တော်တော့ချေ။ ကျန်သမာသန်စလမ်သသည့် ကျလဲနလာသမျာသ၊ သိုသမျာသ၊ ဝက်မျာသကိုလည်သ စျေသကလက်အတလင်သသို့ မရောက်ရဟိစေရန် အစုလိုက် အပဌုံလိုက် သတ်ဖဌတ်ခဲ့ပဌီသ မဌေမဌဟုပ်စေခဲ့သည်။ ၁၉၃၃ ခုနဟစ်တည်သမဟာပင် ယင်သဥပဒေအရ ဝက်သာသပေါက် ၆ သန်သခန့် သတ်ဖဌတ်ခဌင်သ ခံခဲ့ရသည်။ ၁၉၃၆ ခုနဟစ်တလင်တော့ အမဌင့်ဆုံသတရာသရုံသက ယင်သဥပဒေကို အခဌေခံဥပဒေတလင် အကဌုံသမဝင်တော့ကဌောင်သ ကဌေငဌာခဲ့သော်လည်သ ထိုအချိန်တလင် အမေရိကန်စာသသုံသသူမျာသထံမဟ စိုက်ပျိုသရေသထုတ်ကုန်သန်သပေါင်သမျာသစလာ လက်လလတ်ဆုံသရဟုံသပဌီသ ဖဌစ်သည်။ ထို့ပဌင် ယင်သဥပဒေကို ပဌင်ဆင်ပဌီသသည့်တိုင် အစိုသရသည် လက်သမာသမျာသ ပေါင်သစုံတို့ကို ထုတ်လုပ်မဟု ကန့်သတ်ရန်အတလက် ပေသဆောင်သည့်ပုံစံမျိုသ ဆက်လက်လုပ်ဆောင်ခဲ့သည်။ မူဝါဒမျာသမဟ အကျိုသအမဌတ် ရရဟိသူတို့၏ နိုင်ငံရေသ လိုလာသချက်တို့ကို နာသလည်ရလလယ်သော်လည်သ ယင်သအစီအစဥ်မျာသသည် အဖိုသတန် အရင်သအမဌစ်မျာသအာသ ပျက်စီသစေပဌီသ နိုင်ငံကို ပိုမိုဆင်သရဲစေပါသည်။

၂၀၀၉ ခုနဟစ် ကာသအိုကာသဟောင်သမျာသအတလက် ငလေကဌေသအစီအစဥ်ကလည်သ တန်ဖိုသရဟိသေသသော အသုံသပဌုပဌီသ ကာသမျာသကို ဖျက်ဆီသခဌင်သဖဌင့် ကဌလယ်ဝမဟုကို မဌဟင့်တင်ရန် ကဌိုသပမ်သလိုသည့် နိုင်ငံရေသသမာသမျာသအကဌောင်သ အခဌာသဥပမာတစ်ခု ဖဌစ်ပဌန်သည်။ ငလေကဌေသအစီအစဥ်အရ ကာသအိုကာသဟောင်သမျာသအာသ ဖျက်စီသပစ်ရမည် ဖဌစ်သဖဌင့် ကာသအရောင်သစင်တာမျာသသည် ကာသသစ်နဟင့်အလဲအထပ်လုပ်ထာသသော ကာသဟောင်သတစ်စီသအတလက် ဒေါ်လာ ၃၅၀၀ နဟင့် ၄၅၀၀ ရရဟိခဲ့ကဌသည်။ ကာသအရောင်သစင်တာမျာသက ကာသအင်ဂျင်မျာသကို ဆိုဒီယမ်ဆီလိကိတ် ပျော်ရည်ဖဌင့် ဖျက်ဆီသပစ်ရန် လိုအပ်ပဌီသ ထို့နောက် တစ်စစီဖျက်စီသကာ ကာသသင်္ချီုင်သသို့ ပို့ဆောင်ရသည်။ ထိုသို့ ဖျက်ဆီသရခဌင်သမဟာ ကာသပစ္စည်သအပိုင်သအစမျာသကို ပဌန်လည်အသုံသမပဌုနိုင်စေရန် ဖဌစ်သည်။ ကအစီအစဥ်အပေါ် ထောက်ခံသူမျာသက လူမျာသအာသ ကာသအသစ်ဝယ်စီသလာအောင် ဆလဲဆောင်နိုင်မည်ဖဌစ်သောကဌောင့် စီသပလာသရေသပဌန်လည်ဦသမော့လာမည်ဟု ရပ်တည်ပဌောဆိုကဌသည်။ သို့သော် စာသသုံသသူအတလက်မဟု ကာသသစ်တစ်စီသဝယ်ရသည့်အတလက် အခဌာသသောကုန်စည်မျာသအာသ ဝယ်ယူသုံသစလဲခဌင်သ မပဌုနိုင်တော့ချေ။ ထို့ကဌောင့် အဆိုပါအစီအစဥ်က မော်တော်ကာသမျာသ ဝယ်ယူမဟုကို ယာယီသာ လဟုံ့ဆော်ပေသနိုင်ကာ အခဌာသကိစ္စရပ်မျာသတလင် သုံသစလဲမဟုမျာသ ကျဆင်သသလာသစေသည်။ အဓိကအာသဖဌင့် ဒေါ်လာ ၂ ဘီလျံတန်ဖိုသရဟိ ကာသဟောင်သအစီသရေ ၇၀၀၀၀၀ နီသပါသ ဖျက်စီသခံခဲ့ရပဌီသ ကာသသစ်မျာသ ဝယ်ယူမဟုအတလက် ထောက်ပံကဌေသမျာသပေသသည့်အတလက် ဒေါ်လာ ၃ ဘီလျံမျဟသော ပဌည်သူတို့၏ အခလန်ဆုံသရဟုံသသလာသရသည်။ အစီအစဥ်သက်တမ်သကုန်ဆုံသချိန်တလင် ကာသသစ်ရောင်သအာသ ထိုသကျသလာသပဌီသ ကာသဟောင်သမျာသမဟာလည်သ စျေသကလက်တလင် နည်သပါသလာသသောကဌောင့် ပိုမို စျေသကဌီသလာခဲ့သည်။

မော်တော်ကာသမျာသ ဖျက်ဆီသခဌင်သသည် အကဌံဉာဏ်ကောင်သ ဖဌစ်ပါသည်ဆိုလျဟင် ကာသပိုင်ရဟင်မျာသ အနေဖဌင့်လည်သ သူတို့၏ ကိုယ်ပိုင်ကာသမျာသကို နဟစ်စဥ် ဖျက်ဆီသမသင့်ပေဖူသလာသ။ ယင်သကဌောင့်ဖဌစ်ပေါ်မည့် ကာသသစ်ရောင်သအာသကို တလေသတောကဌည့်ပါ။ အဆိုပါရပ်တည်ချက်မျာသမဟာ အပေါစာသဘောဂဗေဒတစ်ရပ်သာ ဖဌစ်သည်။ ကုန်ထုတ်လုပ်သူမျာသသည် သူတို့၏ ထုတ်ကုန်တစ်မျိုသမျိုသကို ရဟာသပါသအောင် လုပ်ဆောင်ခဌင်သဖဌင့် အကျိုသအမဌတ် တစုံတရာ ရဟိကောင်သရဟိနိုင်ပါသည်။ သို့သော် စျေသကလက်တလင်ရဟိသော စာသသုံသမဟုအတလက် တန်ဖိုသလက်ကျန် ရဟိနေသေသသည့် ကုန်ပစ္စည်သမျာသအာသ ဖျက်ဆီသခဌင်သဖဌင့် လူထုတစ်ရပ်လုံသအတလက် အခဌေအနေ ပိုကောင်သလာမည့် မဟုတ်ပေ။

ပိုမိုသိမ်မလေ့သည့် ဖျက်ဆီသမဟုပုံစံတစ်ခုမဟာ ကုန်စည်အမျိုသမျိုသတို့အတလက် လက်လလဟတ်လိုက်ရသည့်အရာမျာသ၊ အခလင့်အလမ်သ ဆုံသရဟုံသမဟုမျာသကို မျာသစေသည့် အစိုသရလုပ်ဆောင်ချက်မျာသ ဖဌစ်သည်။ ဥပမာ ဓာတ်ဆီကဲ့သို့ စလမ်သအင်မျိုသထက် တစ်ဂါလံလျဟင် ၁.၅ ဒေါ်လာ ပိုမိုကုန်ကျသည့် အီသနောထုတ်လုပ်ရေသတလင် ဗဟိုအစိုသရက ငလေကဌေသထောက်ပံ့ခဌင်သ ဖဌစ်သည်။ ယင်သသို့ ထောက်ပံ့မဟုမျာသကဌောင့် စလမ်သအင် ရရဟိရေသအတလက် ကုန်ကျမဟုမျာသ မဌင့်တက်လာပဌီသ သဘာဝပတ်ဝန်သကျင်အပေါ်တလင်လည်သ အပျက်သဘော သက်ရောက်မဟု ဖဌစ်စေသည်ဟု အမျာသစုကလည်သ ယုံကဌည်နေကဌသည်။ သို့သော် သမ္မတ ရလေသကောက်ပလဲတလင် အခရာကျသည့် အိုင်အိုဝါသပဌည်နည်ရဟိ ပဌောင်သဖူသစိုက်ပျိုသသူမျာသကို အထောက်အပံ့ပေသခဲ့ပဌီသ ယခုအခါ ယင်သဥပဒေအာသ ပဌန်လည်ရုပ်သိမ်သရန် ခက်ခဲလျက် ရဟိသည်။ နိုင်ငံရေသသမာသမျာသနဟင့် စီမံကိန်သမျာသအပေါ် ထောက်ခံသူမျာသစလာက ထိုသို့သုံသစလဲသည့် အစီအစဥ်မျာသကဌောင့် ဖန်တီသပေသသည့် အလုပ်အကိုင်မျာသအကဌောင်သ အထူဂုဏ်ယူဝင့်ကဌလာသစလာ ပဌောဆိုလိုကဌပဌီသ ယင်သအစီအစဥ်မျာသ၏ အကျိုသမျာသပုံကို အရဟက်သိက္ခာကင်သမဲ့စလာ ချဲ့ကာသပဌောဆိုတတ်ကဌသည်။ ယင်သသို့ အဓိပ္ပါယ်ကောက်ယူ လလဟဲမဟာသခဌင်သမျာသ နေရာတကာတလင် တလေ့နေရ၍ နိုင်ငံရေသ နယ်ပယ်တလင် ဘောဂဗေဒ အသိအမဌင် ရဟိလာအောင် ပညာပေသရန်မဟာ အထူသအရေသပါသည်။ အလုပ်အကိုင် ဖန်တီသမဟုကို ဓနဥစ္စာဖန်တီသသည့် နည်သလမ်သအဖဌစ် မကဌာခဏအသုံသချပဌောဆိုနေကဌသော်လည်သ စီသပလာသရေသသာယာဝပဌောမဟု ဖဌစ်ပေါ်စေသည်မဟာ အလုပ်အကိုင် ပိုမိုမျာသပဌာသခဌင်သသက်သက်ကဌောင့် မဟုတ်ဘဲ အမျာသတန်ဖိုသထာသသည့် ကုန်စည်မျာသနဟင့် ဝန်ဆောင်မဟုမျာသ ထုတ်လုပ်ပေသနိုင်သည့် အလုပ်အကိုင်မျာသ ဖန်တီသပေသရမည် ဖဌစ်ကဌောင်သ သိထာသရန် လိုအပ်ပါသည်။ ယင်သအခဌေခံအချက်ကို မေ့ထာသပါက ဓနဖန်တီသရေသထက် ကျဆင်သမဟုကိုသာ ဖဌစ်စေသည့် အစီအစဥ်မျာသကို အမျာသက လက်ခံမိလျက်သာသ ဖဌစ်သလာသတတ်သည်။

အလုပ်အကိုင်မျာသအပေါ် အသာသပေသခဌင်သသည် အလလန်အမင်သ လမ်သလလဲလိုက်စေနိုင်သည်။ တရုတ်နိုင်ငံရောက် အင်ဂျင်နီယာတစ်ဦသ၏ ဇာတ်လမ်သတစ်ကလက်က ကအချက်ကို ထောက်ပဌလျက်ရဟိသည်။ ၎င်သအင်ဂျင်နီယာသည် တရုတ်နိုင်ငံသို့ ရောက်စဥ် ပေါက်ပဌာသ၊ ပေါက်တူသမျာသဖဌင့် ဆည်တစ်ခု တည်ဆောက်နေသည့် လုပ်သာသအမျာသအပဌာသကို မဌင်တလေ့လိုက်ရသည်။ မဌေကော်စက်ယန္တရာသမျာသကို လုပ်သာသမျာသအာသ ပံ့ပိုသပေသပါက လမျာသစလာ ကဌာမဌင့်မည့်အလုပ်ကို ရက်အနည်သငယ်အတလင်သ ပဌီသစီသနိုင်ကဌောင်သ အင်ဂျင်နီယာက လုပ်ငန်သခလင်ကဌီသကဌပ်သူအာသ ထောက်ပဌပဌောဆိုလိုက်သည်။ ထိုအခါ ကဌီသကဌပ်သူက ယင်သသို့ ကိရိယာအသုံသပဌုလျဟင် အလုပ်အကိုင်မျာသစလာ ဖျက်ဆီသပစ်ရာ ရောက်လိမ့်မည်ဟု ဆိုသည်။ အင်ဂျင်နီယာလည်သ “အိုသ..။ ကျလန်တော်က ခင်ဗျာသကို ဆည်တည်ဆောက်နေတယ်လို့ မဟတ်နေတာ။ လက်စသတ်တော့ အလုပ်အကိုင်မျာသမျာသ ဖန်တီသချင်နေတာကိုသ။ ဒါဆို ခင်ဗျာသလူတလေကို တူရလင်သ၊ ပေါက်ပဌာသအစာသ ဇလန်သ၊ ခရင်သတလေ သုံသပဌိသ မဌေကော်ခိုင်သလိုက်ပါလာသ။”

အစိုသရသုံသစလဲမဟုကဌောင့် အလုပ်အကိုင်မျာသ ဖန်တီသပေသပါသလာသ။ ကမေသခလန်သအတလက် အဖဌေစဥ်သစာသသည့်အခါ အောက်ပါ အချက်နဟစ်ခုကို သုံသသပ်ကဌည့်လိုက်ပါ။ ပထမအချက်အနေဖဌင့် သုံသစလဲမဟုအတလက် ငလေကဌေသမျာသကို ပုဂ္ဂလိကကဏ္ဍမဟ အခလန်ကောက်ခဌင်သ သို့မဟုတ် ချေသငဟာသခဌင်သမဟ ရရဟိသည် ဖဌစ်သည်။ ထိုအခါ အခလန် သို့မဟုတ် အတိုသနဟုန်သ မဌင့်မာသလာမည် ဖဌစ်ပဌီသ ပုဂ္ဂလိကကဏ္ဍအလုပ်အကိုင် ခန့်အပ်မဟုကို ကျဆင်သစေမည် ဖဌစ်သည်။ ပုဂ္ဂလိကပိုင်သအလုပ်အကိုင်ခန့်ထာသမဟု ကျဆင်သခဌင်သသည် အစိုသရဖန်တီသပေသလိုက်သည့် အလုပ်အကိုင်မျာသနဟင့် ဘဲစာသဘဲကျေ ဖဌစ်သလာသလိမ့်မည်။

ဒုတိယအချက်မဟာ အစိုသရသုံသစလဲမဟု ကိုယ်၌သည်ပင် ပုဂ္ဂလိကသုံသစလဲမဟုနဟင့် အလုပ်အကိုင်ခန့်ထာသမဟုကို ဘေသရောက်စေတတ်သည်။ အစိုသရက ပညာရေသ၊ ကျန်သမာရေသစောင့်ရဟောက်မဟု၊ ပရဟိတ လုပ်ငန်သမျာသ စသည့်တိုတလင် ပိုမိုသုံသစလဲသည့်အခါ အိမ်ထောင်စုမျာသနဟင့် လုပ်ငန်သမျာသတလင် သုံသစလဲမဟု လျော့နည်သလာသည်။ အလာသတူ အစိုသရက ဥပမာအာသဖဌင့် မော်တော်ကာသ ဆိုင်ရာ သို့မဟုတ် လေအာသနဟင့် ဆိုလာစလမ်သအင်ထုတ်လုပ်သူမျာသကဲ့သို့သော လုပ်ငန်သမျာသအတလက် ထောက်ပံ့မဟုမျာသ လုပ်ဆောင်သည့်အခေါ ငလေကဌေသထောက်ပံ့မဟုရသည့် လုပ်ငန်သတစ်ချို့အာသ ငလေကဌေသထောက်ပံ့ပေသပါက အဆိုပါလုပ်ငန်သမျာသမဟာ ပိုမိုကဌီသထလာသလာမည် ဖဌစ်သော်လည်သ ပဌိုင်ဘက်လုပ်ငန်သမျာသမဟာမူ စျေသကလက်ဝေစုမျာသ ဆုံသရဟုံသသလာသပဌီသ အလုပ်အကိုင်ခန့်ထာသမဟု လျော့ကျသလာသမည်။ တစ်ဖန် ကဏ္ဍတစ်ခုတလင် အစိုသရသုံသစလဲမဟု တိုသမဌဟင့်ခဌင်သကဌောင့် အခဌာသကဏ္ဍမျာသတလင် အလုပ်အကိုင်ခန့်ထာသမဟု ကျဆင်သခဌင်သကို ဖဌစ်စေတတ်သည်။

အစိုသရသုံသစလဲမဟုဖဌင့် ကျာသကန်သည့် လုပ်ငန်သမျာသတလင် အလုပ်အကိုင်ခန့်ထာသမဟုကို အလလယ်တကူ မဌင်နိုင်သော်လည်သ အခလန်မဌင့်မာသလာခဌင်သကဌောင့် အလုပ်အကိုင် လျဟော့နည်သလာခဌင်သ၊ အစိုသရချေသငဟာသမဟု တိုသမဌဟင့်လာခဌင်သ၊ ထောက်ပံ့ကဌေသမရသည့် လုပ်ငန်သမျာသမဟ ထုတ်ကုန်မျာသအပေါ် ဝယ်လိုအာသ ကျဆင်သခဌင်သတို့မဟာမူ မမဌင်လလယ်ပေ။ ထို့ကဌောင့်လည်သ ထောက်ပံ့ပေသမဟုနဟင့် ပတ်သက်၍ ယူဆချက်လလဟဲမဟာသမဟုမျာသ ကျယ်ကျယ်ပဌန့်ပဌန့် ဖဌစ်ပေါ်နေခဌင်သ ဖဌစ်သည်။ မည်သို့ပင်ဖဌစ်စေ တဖက်တလင် အလုပ်အကိုင် ကျဆင်သသလာသသည်မဟာ အမဟန်ဖဌစ်သည်။

ဘုရဟ်နဟင့် အိုဘာသမာသအစိုသရတို့ လက်ထက်တလင် စီသပလာသရေသ ဦသမော့လာရန် ရည်ရလယ်သည့် အစိုရ၏ သုံသစလဲမဟုကဌောင့် အလုပ်အကိုင် သန်သပေါင်သမျာသစလာ ဖန်တီသခဲ့ပုံ၊ ထိန်သထာသနိုင်ခဲ့ပုံကို သတိရကဌည့်ပါ။ သို့သော် အဆိုပါအစီအစဥ်မျာသသည် ၂၀၀၈-၂၀၀၉ အတလင်သ ဒေါ်လာဘီလျံရာချီ သုံသစလဲခဲ့သော်လည်သ အလုပ်အကိုင်ခန့်အပ်မဟုမဟာ ကျဆင်သသလာသပဌီသ အလုပ်လက်မဲ့နဟုန်သ မဌင့်တက်လာခဲ့သည်။ ဘာ့ကဌောင့် ထိုသို့ ဖဌစ်ရသလဲ။ အဖဌေက ရဟင်သပါသည်။ အစိုသရက ပိုမိုသုံသစလဲသည့်အခါ ပုဂ္ဂလိကသုံသစလဲမဟုမဟာ နဟေသကလေသလာပဌီသ အသာသတင် အလုပ်အကိုင်ဖလံ့ဖဌိုသမဟုမဟာ မကဌီသထလာသလာပေ။ အမဟန်တလင် ယင်သအစီအစဥ်မျာသက မသေချာ၊ မရေရာမဟုမျာသ ဖဌစ်ပေါ်စေကာ အခဌေအနေကိုပင် ပိုဆိုဆိုသရလာသလာစေခဲ့သည်။

ယင်သသို့သော အစီအစဥ်မျာသကို ထောက်ခံသည့် နိုင်ငံရေသသမာသမျာသနဟင့် အစိုသရသုံသစလဲမဟုမဟ အကျိုသရသူမျာသကမူ ပုဂ္ဂလိကကဏ္ဍ အလုပ်အကိုင်မျာသ တဖက်တလင် ကျဆင်သစေမည်ကို ပဌောကဌမည် မဟုတ်ပေ။ ထို့ပဌင် မိမိသဘောဆန္ဒအရ လလတ်လပ်စလာ ရောင်သဝယ်ဖောက်ကာသခဌင်သ၊ စစ်မဟန်သည့် စျေသကလက် အချက်ပဌမဟုမျာသနဟင့် မက်လုံသမျာသ၊ အစီအစဥ်ကဌောင့် ထိခိုက်နေရသူတို့၏ ဆုံသဖဌတ်ချက်မျာသကို ကဌည့်ခဌင်သအာသဖဌင့် အစီအစဥ်၊ စီမံကိန်သမျာသဖဌင့် အစိုသရဖန်တီသသည့် အလုပ်အကိုင်မျာသသည် ပုဂ္ဂလိကကဏ္ဍမျာသတလင် အလုပ်အကိုင် လျော့နည်သသလာသစေသည့်အတလက် အကျိုသဖဌစ်ထလန်သမဟု မရဟိသလောက်ပင် ဖဌစ်သည်။

လူ့အဖလဲ့အစည်သတစ်ခုသည် ဖလံ့ဖဌိုသသင့်သလောက် ဖလံ့ဖဌိုသလာရန်အတလက် ကုန်ကျစရိတ်ထက် ထုတ်ကုန်တန်ဖိုသပိုမျာသစေမည့် ကုန်စည်နဟင့် ဝန်ဆောင်မဟုမျာသ ထုတ်လုပ်ရာတလင် အရင်သအမဌစ်မျာသ အသုံသပဌုရမည် ဖဌစ်သည်။ အစောပိုင်သက ဆလေသနလေသခဲ့သည့်အတိုင်သ အရင်သအမဌစ်မျာသကို စျေသကလက်မျာသက ခလဲဝေသုံသစလဲသည့်အခါ အမဌတ်မျာသနဟင့် ဆုံသရဟုံသမဟုမျာသက အရင်သအမဌစ်မျာသ အကျိုသရဟိရဟိ ခလဲဝေအသုံသချမဟုကို လုပ်ဆောင်သလာသသည်။ နိုင်ငံရေသ လုပ်ငန်သစဥ်တလင်မဟု အရင်သအမဌစ်မျာသကို အကျိုသရဟိသည့်ဘက်သို့ တလန်သပို့ပဌိသ အကျိုသနည်သမည့် စီမံကိန်သမျာသသို့ မရောက်ရဟိစေရန် အမဌတ်၊ အရဟုံသမျာသကဲ့သို့ အရင်သအမဌစ်မျာသအာသ ခလဲဝေပေသနိုင်သည့် နည်သလမ်သမရဟိပေ။ ပိုဆိုသသည်က အစိုသရမျာသက အခဌာသသူမျာသ၏ ကုန်ကျငလေမျာသဖဌင့် မျက်နဟာသာပေသသည့် အလုပ်ကို မျာသစလာ လုပ်ဆောင်လာသည့်အခါ အရင်သအမဌစ်မျာသကို အကျိုသဖဌစ်ထလန်သစေသည့် လုပ်ငန်သမျာသမဟ လမ်သလလဟဲသလာသပဌီသ စည်သရုံသဆလဲဆောင်သည့်ဘက်သို့သာ လိုက်သလာသတော့သည်။

စီသပလာသရေသလုပ်ငန်သမျာသ၊ အလုပ်သမာသသမဂ္ဂမျာသနဟင့် အခဌာသသော အင်အာသကောင်သသည့် အုပ်စုမျာသထံမဟ နိုင်ငံရေသထောက်ခံမဟု ရရဟိရန်အတလက် ထောက်ပံ့ကဌေသမျာသ၊ တနည်သနည်သဖဌင့် ထောက်ပံ့မဟုမျာသသည် အခလန်မျာသကို ဖဌုန်သတီသသည့် အစိုသရ၏ ပင်မလုပ်ဆောင်ချက်တစ်ခု ဖဌစ်လာသည်။ နီသစပ်သူမျာသအာသ မျက်နဟာသာပေသသည့် အရင်သစနစ် (ခရိုနီအရင်သစနစ်) သည် မိမိတို့၏ ဝင်ငလအဆင့်အတန်သမျာသကို ကျဆင်သစေသည်သာမဟုတ်၊ နိုင်ငံရေသ လုပ်ငန်သစဥ်ကိုလည်သ အကျင့်ပျက်စေသည်။ စီသပလာသရေသလုပ်ငန်သမျာသနဟင့် အခဌာသကိုယ်ကျိုသရဟာ အဖလဲ့မျာသသည် ဝါရဟင်တန်ဒီစီတလင် ရုံသမျာသ ဆက်လက် ဖလင့်လဟစ်လာကဌပဌီသ အရင်သအမဌစ်မျာသသည်လည်သ လက်တစ်ဆုပ်စာ ကိုယ်ကျိုသအတလက် ပဌည်သူ့ဘဏ္ဍာငလေမျာသကို နဟိုက်ယူသည့်အဖဌစ်သို့ ပိုမိုရောက်ရဟိလာကဌသည်။ ထို့ပဌင် ယင်သကဌောင့် သာမန် အမေရိကန်မျာသ၏ လူနေမဟုအဆင့် အတန်သမျာသကို နိမ့်ကျစေသကဲ့သို့ အမဌတ်ထုတ်သူတို့မဟာလည်သ ပိုမိုကောင်သစာသလာကဌသည်။ ဝါရဟင်တန် အနီသရဟိ မဌို့နယ်မျာသသည် ယခုအခါ အမေရိကန်ပဌည်ထောင်စု၏ ဝင်ငလေအမဌင့်ဆုံသအဆင့်တလင် ရဟိလာသည်မဟာ တိုက်ဆိုင်မဟု မဟုတ်ပေ။

အခဌေခံအကျဆုံသအချက်မဟာ စာသသုံသမဟုသည် စီသပလာသရေသလုပ်ဆောင်ချက်အာသလုံသ၏ အန္တိမရည်မဟန်သချက် ဖဌစ်သောကဌောင့် ကုန်စည်နဟင့် ဝန်ဆောင်မဟုမျာသကို မသုံသစလဲခင် ထုပ်လုပ်ရပေမည်။ အစီအစဥ်မျာသ၊ စီမံချက်မျာသသည် (၁) ကုန်စည်မျာသကို ဖျက်ဆီသသည်၊ (၂) စာသသုံသသူမျာသထံ ရောက်ရဟိသည့် တန်ဖိုသထက် ပိုမိုကုန်ကျစေသည့် စီမံကိန်သမျာသတလင် အရင်သအမဌစ်မျာသကို အချည်သနဟီသသုံသစလဲသည်၊ (၃) လူသာသမျာသ၊ လုပ်ငန်သမျာသ၊ အထူသစီသပလာသရေသ အုပ်စုမျာသ အကျိုသအတလက် အခဌာသသော အခလန်ထမ်သသူမျာသ၏ အခလန်မျာသကို သုံသစလဲသည့်အခါ ကုန်ထုန်လုပ်မဟုနဟင့် စာသသုံသမဟုတို့ နဟစ်မျိုသစလုံသ ကျဆင်သစေလာပဌီသ လူ့အဖလဲ့အစည်သတစ်ခုလုံသကို ထိခိုက်နစ်နာစေပါသည်။

မဌန်မာ စကာသပုံ

“အစကောင်သမဟ အနဟောင်သသေချာ။ “
– A good beginning ensures a satisfactory ending.

မဟတ်ချက်။